Meri Kahani!

Baitho kabhi sath mere bhi, do baatein karo, baatein karo

Chahe bhale baad me tod do, vaade karo, vaade karo.

Likh rahi hun aaj apni kahani, is umeed se ki aj zaroor apni baat ko rakhungi duniya ke saamne.

Mera naam Mehak hai aur mai 22 saal ki hui hun abhi qareeb 2 mahine pehle. Mai Haryana ki rehne vali hun aur filhal pichle 4 saal se reh rahi hun Murthal ke ek government college ke hostel me.

Grad student hun mai aur 2017 me schooling complete karne ke baad maine Haryana ke ambala sheher se Diploma in Architecture Assistantship me admission liya jiske last year tak aate aate lockdown ho chuka tha yane ki March 2020. Fir Diploma complete karne ke bad same field me hi aage badhne ki umeed se maine admission liya Haryana ki state university me yani ki Murthal me. So basically I am a student of architecture in pre final year who is struggling to live these days.

Yahan aane ka faisla maine bas yahi soch kar liya ki mujhe likhna bohot acha lagta hai par janti hun ki blogs likhne ka zamana ab jaa chuka hai. Aur aaj ki generation me itna dhairya kahan hai ki tasalli se baith kar kisi ki kahani padhein? Mujhme bhi nahi hai! Dheemi si hasi haske aage badhti hun kyun ki fir bhi kahin na kahin dil me ek ummeed hai ki shayad koi ek virla shaqs zaroor meri kahani padhna chahega.

Kuch dino pehle holi ki chhutti pe mai ghar laut aayi thi aur ab jab chhuttiyan khatm hone par sab vaapas college ja chuke hain aur classes lagni shuru hogyi hain mai phir vahin aa khadi hun, ghoom phir kar zindagi ke usi maud pe jahan mai phir se himmat haar chuki hun. 

Bohot pareshan toh hun ye soch kar ki kyun ab mera kuch bhi karne ka man nahi karta kyun ab mai pehle ki tarah khush nahi rehti. There's no passion left inside! 

Par, ghar, acha lagta hai. Yahan kisi se baat nahi karni padti, kisi ko kuch kaaran nahi dena padta ki aaj mai kyun chup hun aur kyun aaj mai pareshan hun. Kab tak jhooth ke sahare zindagi jee sakta hai koi insan? kya kisi kitaab me iska bhi jawab hai?

Kaisi akeli si khamosh si, hai raat bhi khud me khoyi si

tanhaiyan thodi kam ho isi naate karo, baatein karo.

Agle session me shayad thoda aur khul paungi par aaj ke ya shayad abhi ke liye, itna hi!